فلان بالشكلاط سهل ومضمون من مطبخ سميرة

بسم الله الرحمان الرحيم ، السلام عليكم ، كنتمنى اليوم تكـون وصفتي
ساهلة وتتعجبكـم ..
اليوم غنديروا الفلان على طريقتي جـد سهلـة في الحقيقـة ولكن راه النتيجـة ديالها
مضمونـة ورائعة ..
أولا المقادير :
نصف لتر حليب
120 غ سكر
4 بيضات
2 صفار بيض
باكية شكلاط أسود ( أنا درت ديال 250 غ ديال تجهيز الحلوى ) ممكن تكون كمية أقل .
للكراميل :
150 غ سكر
50 ماء
الطريقـة :
في كاسرول كنديروا الحليب مع السكر ونسخنوهم على نار مهيلـة .
وكنضربوا البيض مع صفار البيض ونبداو نضيفوا لهم الحليب الساخنـة بشوي بشوي

وحنا كنضربوا فو الكاس ديل مولينكس ولى تورميكس .
من بعد ماحد مازال سخون كنضيفوا للمقـادير الشكلاط باش يدوب لنـا ولى ندوبوه
قبل في حمام مريم ولى في الكيروأوند ونضيفوه .
وحنا كنديروا في الفلان كنكونوا كنجهزوا في الكراميل اللي غنديروا معاه .
عادي بحال ديما كنديروا السكر مع الماء على النار حتى كيتحمر لنا
اللون ديالو وياخذ واحد اللون بني فاتح ولامع .
ممكن إضافة واحد قطرات ديال الفانيل مع الكراميل باش يجي منسم
اللي بغى ، ٱختياري ...
دابا نجيووا للطريقة ديال الطياب ديالوا :
كناخدوا المول اللي غنطيبوه فيه كنحطوا في القاع الكراميل
وهو مازال سخون ( باش يكون سائل ) ماشي يكون طايب
باش لكان مول سلكون مايحرقوش لنا .
وكنديروا المول في صينية الفران أو مول كبر من الأول
نكبوا فيه مـاء مغلي باش غادي يطيب لنا الفلان في حمام
مريم ..
وفي المول اللي فيه الكراميل غنديوا الفلان ( اللي عاد صيبناه
وهو مازال ) سخون .. لكان برد عاودي سخنيه .
كنسدوا عليه بورق ألومينيـوم وندخلوه لفرن مسخن مزيان قبل
على درجـة حرارة 140 حتال 160 ( حسب الرفب ديالك
والجهد ديالو ) لمدة 45 دقيقـة .
قبل ماتخرجيه من الفران جربي بعويد ديال الكوزينة واش
طاب بحال القضية اللي كنديوا للكيك ، لخرج نقي راه طاب .
وطريقـة ثانية وسريعة لطهيه هي : في الكوكوط كديري مول
ديال الحديد ماشي جاج ماشي سيليكون باش مايطرطق مايتحرق
وتحطي المول عامر عادي مع الكراميل والفلان .
والقليل من الماء الغلي وتسدي الكوكوط ومنين تبدى تصفر حسبي
15 دقيقـة .
ـ خرجي الفلان وخليه يبرد عاد حيديه من المول .
وبصحة والراحـة .